رنجور عشق
گوزل مهدی نین تانریسی آدینان
سنسیز ای آرام جانیم یوخدو جانانیم منیم
بسدی هجران هارداسان ای شانلی سلطانیم منیم
یوخدو طاقت تا قیلام شور نهانیم شرحینی
شرحه شرحه سینه واردیر الده عنوانیم منیم
چوخ پریشان روزگارم ، حالیمی ایلر بیان
باد هجریله سولان حال پریشانیم منیم
عادت اولموش هر گئجه خلوتگه غمخانه ده
سوز و آهمدان یانار شمع شبستانیم منیم
ایسته رم حقدن ، فدا ائتسین منی او یاریمه
باغلانیب جانیله دائم عهد و پیمانیم منیم
باش و جان لازیمدی قوربان ائیله یم جانانیمه
بی بهادیر عشق بازارینده بو جانیم منیم
دردیمین درمانینه یئرسیز تلاش ائیلر طبیب
خسته و رنجور عشقم یوخدو درمانیم منیم
یوخدو بیر محرم اونا ، تا گوسترم دل یاره سین
نامه اعمالیمه شاهددی یزدانیم منیم
اولمادی دادماق زلال وصل یاری "فرزبود"
تکجه یاندی سو یانیندا قلب عطشانیم منیم
کلمات کلیدی : دلتنگی
